'Gogotsu eta itxaropentsu gaude KORRIKA buru-belarri antolatzen'
Maialen Otegi Oarsoaldeko AEK-ko KORRIKA arduraduna, Korrika Laguntzaile pina eskuan duela |
KORRIKA urteetan, Oaroaldeko AEK-ko eskifaiak patroia behar izaten du, eta aurten Maialen Otegi Oreretako Xenpelar AEK-ko irakaslea dugu lemazain. Motorrak berotzen ari garen honetan, hona hemen eskualdeko KORRIKA arduradunak kontatu diguna.
KORRIKA martxoaren bukaeran abiatuko da Amurriotik, baina AEKn ia-ia ikasturtea hastearekin batera ekiten zaie prestakuntza-lanei...
Bai, hala
da. Ikasturtea hasi orduko hasten gara euskaltegietan KORRIKA usaina
nabaritzen. Berehala iristen da arropa, lehen bilerak izateko
deialdiak... Baina horri esker ikasturtea gogotsu hasten dugu! Izan
ere, badakigu KORRIKAk lana dakarrela, baina horren gainetik dago
sortzen digun ilusioa. Gainera, aurten berezia izango da, nahi baino
beranduago baitator Korrika [gogoan izan iaz ezin izan zela egin pandemiagatik], eta beraz, itxarote horrek ere gogo
handiagoarekin hartzera garamatza.
KORRIKAko arropa izan dugu eskualdeko lau herrietan. Zer moduzko harrera izan du orain arte? Izango al da aukera gehiago arropa gure eskualdean erosteko?
Arropa polita iritsi zaigu
euskaltegietara, bai! Oraingoz, Oarsoaldeko herri gehienetan jartzeko
aukera izan dugu, batez ere, Gabonetako opor luze hauetan; eta
harrera ona izan du, jende asko hurbildu da arropa ikusi eta
probatzera!
Hemendik aurrera ere euskaltegiz euskaltegi mugituko
dugu arropa, eta herrietara ateratzeko asmoa ere badaukagu. Egon adi
gure sareei, bertan jarriko baitugu nondik nora mugituko dugun
salmenta puntua. Eta ez ahaztu, hurbiltzeko aukerarik izan ezean, KORRIKAko web-orrian etxetik bertatik erosteko aukera izango
duzue.
Korrika Laguntzaile ere izaten dugu ahotan
hilabeteotan. Zeintzuk dira ekimen horren abantailak?
Korrika
Laguntzaile izatea da KORRIKA laguntzeko modurik onena eta
errazena.
Laguntzailea izan nahi duenak, 12€ren truke hainbat
abantaila izango ditu: batetik, KORRIKAko txartela iritsiko zaio
etxera; horri esker KORRIKAren ekimenetan lehentasuna edo deskontuak
izango ditu, eta baita AEK-ko ikastaroetan eta AIZU! aldizkariko
harpidetzan ere. Bestetik,astero-astero egiten ditugun zozketetan
parte hartu ahal izango du, 300 sari baino gehiago daude! Horrez
gain, aurtengo KORRIKAren leloa daraman pina jasoko du, soinean
daraman arropa apain dezan.
Horregatik, hemendik irakurleak
animatu nahi ditut Korrika Laguntzaile izan eta Korrika laguntzera.
Oso erraza da! Pasa gure euskaltegietatik, edo sartu
korrika.eus web-gunean.
Herriko batzordeen txanda da
orain. Nola animatuko zenituzke Lezo, Oiartzun, Orereta eta Pasaiako
herritarrak batzordeotan parte hartzera?
Hori da KORRIKA
eta, noski, euskararen bultzadan laguntzeko beste modu bat:
herrietako batzordeetan parte hartzea, hain zuzen ere.
Nork ez
du euskararen alde antolatzen den lasterketa erraldoiaren parte izan
nahi? Herria girotu nahi duena, herria euskalduntzen lan egin nahi
duena, eta herria euskalgintzatik sortu daitekeela sinesten duen oro,
hurbil dadila! HITZArekin eta EKINTZArekin lortuko baitugu ekimen hau
aurrera eramatea.
Afariak, kultur ekitaldiak... Horiek
denak airean daude, zoritxarrez, baina espero dezagun pandemiak 22.
KORRIKA ez oztopatzea...
Hori ikusteko dago. Oraingoz,
gogotsu eta itxaropentsu gaude KORRIKA buru-belarri antolatzen, eta
badirudi, ordurako testuinguru egokiagoa izango dugula. Egia da ziur
aski ezin izango ditugula beste urte batzuetan antolatzen ditugun ekimen
guztiak normaltasun osoz antolatu; baina beno, gauza berrietan ere
pentsatuko dugu eta saiatuko gara herriak ahalik eta ondoen girotzen.
Iruzkinak
Argitaratu iruzkina