Korrika batzordeak egingo dira eskualdean aste honetan

Martxoaren 19an abiatuko da Korrika 19 Nafarroa Beheretik, Urepeletik hain zuzen ere, eta 11 egun geroago Bilbon amaituko da. Tartean, AEK-k antolatzen duen euskararen aldeko lasterketa erraldoiak Euskal Herria zeharkatuko du Euskahaldun! lelopean. Azken finean, euskararen alde aritzen diren euskaldun guztiak, eta noski euskara ikasteko esfortzua egiten ari diren guzti-guztiak ere gara euskahaldunak.

Korrika 19 eskualdera martxoaren 21ean, larunbat goizarekin, iritsiko da, Astiagarragan barrena. Orereta eta Oiartzundik igaro eta gero, Ipar Euskal Herrirantz abiatuko da eta biharamunean, hots martxoaren 22an, igande goiz-goizean Lezo, Pasai Donibane, Pasai San Pedro, Trintxerpe eta Antxon egingo diogu harrera.

Aipatu egunetan lekukoarekin edo lekukoaren atzetik korrika egiteaz gain, ohi bezala, Korrikari merezi duen ongietorria egin nahi diogu eskualdean, ekimena girotu nahi dugu egitarau zabalarekin. Jarduera sorta hori tokian tokiko ahalik eta eragile gehienekin batera osatu nahi dugu, euskaltzale guztiok senti gaitezen Korrikaren parte, denok senti gaitezen euskahaldun, eta horretarako batzorde irekiak egingo dira eskualdean, aste honetan hasita.

Hona hemen dagoeneko finkatuta dauden batzordeetako hitzorduak:

• Oreretan, hilaren 13an asteartea 19:00etan Xenpelar AEKn
• Pasai Antxon, hilaren 14an, asteazkena, 18:00etan, Txirrita AEKn
• Oiartzunen, hilaren 16an, ostirala, 17:30ean, Intxixu AEKn
• Lezon, hilaren 16an, ostirala, 18:00etan, Oroitzene AEK-n

*Trintxerpen, Pasai Donibanen eta Pasai San Pedron ere batzordeak antolatuko dira. Data zehazteke dago.