Argazkilaritza tailerra egin dute Pasaiako Txirrita AEKn

Txirrita AEK-ko ikasle eta irakasleetako batzuk. Nork atera digun argazkia? Ba argazkilaritzaz mintzatu zaiguna, noski, Joxe Anjel.

Ostegunean, urtarrilak 23an, bi kanpo ekintza egin ditugu Pasaiako Txirrita AEK euskaltegian. Alde batetik, goizean Joxe Anjel Areta ikasle ohiaren bisita jaso dugu. Joxe Anjel argazkilari fina da -Oreretako Segundo Ispizua kalean estudioa ireki berri du-, musika da bere pasioa eta musika talde asko erretratatu ditu eszenatokian. Irudi horietako batzuk erakutsi dizkigu Jose Anjelek, eta horretaz gain, argazki kamerarekin iaioa dela aprobetxatuta, gure argazki kamerari zuku gehiago ateratzeko aholku batzuk eman dizkigu.

Bestalde, arratsaldean, irakasle eta ikasle batzuek Donostiako Antzoki Zaharrean Kokakola eta Barea antzezlana ikusi dugu. Belarria fintzeko ez ezik, barre egiteko ere obra aproposa da. Ramon Agirre eta Inaxio Tolosa dira aktoreak eta Ez dok Amairu taldearen garaia gogora ekartzen dute, umorez.

Txirrita AEK hurrengo hitzordua larunbatean izango da. 12:00etan ikasle eta irakasleok Pasai Donibanera joango gara euskaraz bizitzeko Prest! Gaudela lau haizetara zabaltzera.