ASTE HONETAKO ASMAKIZUN LEHIAKETA: irabazi Artzeren esaldia, "Hizkuntza bat ez da galtzen...", gurutze-puntuan egina!

Hizkuntza bat ez da galtzen

ez dakitenek ikasten ez dutelako,

dakitenek hitz egiten ez dutelako baizik.

Ezaguna izango zaizue esaldia, ezta? Bada, esaldi hori bera gurutze-puntuan eginda irabazi nahi baduzue, aste honetako asmakizun-lehiaketan parte hartu besterik ez daukazue.

Aste honetako asmakizuna Oreretako Xenpelar AEK euskaltegiko 20. taldeko ikasleek prestatu dute (A2 mailako Iosuren goizeko ikasleak). Eskerrik asko zuei.

Orain, besterik gabe, goazen prestatu dituzten arrastoak ikustera:

1. arrastoa: Euskal Herriko tokirik bisitatuenetakoa da.

2. arrastoa: Bertan, uretan kontserbatutako antzinako objektuak topatu dituzte.

3. arrastoa: Toki hau dagoen herriak ez du alkaterik.

4. arrastoa: Arrastoa irudi hau da.

Zer? Ba al dakizue erantzuna? Ala arrasto gehiagoren beharrean zaudete? Badakizue, beti bezala, erantzuna orereta@aek.org helbidera bidali. Erantzuna jasotzeko azken epea: ostirala, hilak 15, 18:00etan.