Mintza goxo: erabilerari begirako ekintzak Oarsoaldeko AEKn

 

Ostiral arratsalde ederra pasa genuen Lezoko Saldise plazan antolatutako Mintzodromoan.

Lezoko Mintzalagun egitasmoari hasiera eman genion eta bertan, Lezoko alkatea den Mikel Arruti zein egitasmoaren herriko dinamizatzaile dugun Edurne Lizarazuren hitz batzuen ondoren, 40 bat lagun (Lezoko bidelagun eta bidelariak zein Pasaia eta eskualdeko lagunak) aritu ziren hitz eta pitz ordu eta erdiz.

Gainera, Lezoko bidelagun eta bidelariez gain, aipatzekoa deritzogu Pasaiako eta eskualdeko beste herrietako adin guztietako partaide eta lagunak ere hurbildu zirela deialdira. Hortaz, mila esker guztioi plaza hartu eta berau euskaraz blaitzeagatik!

Egitasmoari hasiera goxo eta eroso bat emateaz gain, bestalde, Oarsoaldeko AEKko erabilera koordinatzailea den Maritxu Oiartzunek eskualdeari begira sortu dugun Mintza Goxo proiektua aurkeztu zuen. Azken honen helburua izango da, euskaltegietatik at, erabilerari begirako ekimenak sortu eta martxan daudenak egonkortzen eta handitzen laguntzen jarraitzea; bai eta eskualde mailako hiztunak saretzea ere. Horretarako, ohiko eskolez gain, aisiari lotutako ekintzak antolatuko ditugu, euskaraz eroso bizi gaitezen euskara praktikoa ardatz . Oarsoaldeko AEKn argi baitugu gure eskualdeak baldintza on asko dituela euskararen erabilera-tasan jauzi kualitatibo handi bat egiteko.

Mintza Goxo proiektutik antolatuko ditugun ekintzak eskualdeko herritar orori irekiak izango dira: bai gure ikasleentzat, bai Mintzalagunetako partaideentzat, bai eta, esan bezala, euskaraz gozatu, praktikatu eta une goxo bat igaro nahi duen ororentzat ere. Deialdiak ohiko komunikazio bideetatik zabalduko ditugu; hortaz, adi ibili!

Egitasmoetara zein proiektura mota askotako herritarrak hurbildu daitezkeela uste dugu, eta sektore hauetan banatu ditugu:

– Euskara ulertzeko gaitasuna dutenak, baina hitz egiteko ohitura edo baliabide falta dutenak.

– Euskaltegietako ikasleak eta ikasle ohiak: euskaltegitik kanpo edo behin euskaltegia utzita, euskarari eutsi nahi diotenak eta egoera errealak bilatzen dituztenak.

– Ikasketa-prozesu formala nahi ez dutenak: euskaltegietako eskola zurrunetara joan nahi ez, baina euskara lantzen jarraitu nahi dutenak.

– Euskal hiztun aktiboak: euskara jakin eta normaltasunez erabiltzen duten pertsonak.

– Euskaldun pasiboak: egoera soziolinguistikoa dela medio, egunerokoan euskaraz aritzeko aukera, erraztasuna edota adierazkortasuna galdu dutenak. Egitasmo honek pasibo izatetik aktibo izatera igarotzeko aukera eskainiko die.

Gogoratu, azkenik, Pasaian eta Lezon abian ditugun Mintzalagun egitasmoetan izena emateko aukera badela oraindik, izan bidelagun zein bidelari gisa: Pasaiako kasuan euskaltegietara bertaratuz, pasaia_mintza@aek.eus posta elektronikora idatziz, edota 688 647 159 telefono zenbakira idatziz edo deituz; eta Lezokoan, berriz, euskaltegira hurbilduz, 943 51 91 44 telefono zenbakira hots eginda edota Lezo@aek.eus idatziz.