Oarsoaldeko AEK, azaroaren 4ko manifestazioarekin bat

 

Oarsoaldeko AEK-ko kideak, gaur.

 

Azaroaren 4an euskalgintzak deitutako manifestazio nazionala egingo da Bilbon, 17:00etan Euskalduna jauregitik abiatuta. Manifestazioa euskararen normalizazioaren kontrako oldarraldiaren testuinguruan kokatzen da. Izan ere, azkenaldian auzitegietatik areagotu egin dira euskararen sustapena eta normalizazioa helburu duten hainbat neurriren aurkako sententziak.

Euskal Herri osoan AEK erreferente izatea nahi dugu hiztun aktiboak sortzen. Gure xedea da Euskal Herriko biztanle guztiak euskaraz eroso bizitzea, ahalegin berezirik egin gabe; biztanle guztiek euskaraz eroso aritzeko baldintzak edukitzea eta euskara erabiltzeagatik ez sentitzea deseroso edo baztertuta.

Gure ikuspegia eta egitekoa horiek izanik, eta kontuan hartuta proiektu estrategikotzat hizkuntza-politikan eragitea dugula, euskararen normalizazioaren kontrako oldarraldiari aurre egitea dagokigu. Argi dago azkenaldikoak ez direla sententzia isolatuak, baizik eta botere judizialetik hizkuntza-politika aurrerakoiak mugatzeko eta herritarron hizkuntza-eskubideak murrizteko joera, oldarraldi bat.

Hori horrela, Oarsoaldeko AEK-ko lau euskaltegiok (Lezoko Oroitzene AEK, Oiartzungo Intxixu AEK, Oreretako Xenpelar AEK eta Pasaiako Txirrita AEK) bat egiten dugu azaroaren 4ko manifestazioarekin. Eskualdean autobusak antolatzen ari gara Bilbora joateko eta blogaren eta sare sozialen bitartez autobusotan izena emateko prozeduraren berri emango dizuegu datozen egunotan. 

Oiartzundik abiatuko den autobusa iragartzeko kartela