Laura Navarro, Oarsoaldeko Maskarilla Solidarioak ekimenean jo eta su

Laura Navarro, Lezoko Oroitzene AEK euskaltegiko ikaslea

Laura Navarro Vegak (Sevilla, 1978), Lezoko Oroitzene AEK euskaltegiko ikasleak, honela definitzen du bere burua: “aktibista soziala, Sevillakoa eta ama”. Lezon bizi dira orain dela sei urte, bere hitzetan, “oso gustura”. Azken asteotan, buru-belarri ibili da OarsoaldekoMaskarilla Solidarioak ekimena aurrera ateratzen. Dagoeneko, 1.000 maskaratik gora josi eta banatu dituzte gure eskualdean.

• Zer da Maskarilla Solidarioak Oarsoaldea ekimena?
  

Gu talde txiki bat ginen, duela hilabete batzuetatik elkartzen hasiak ginenak, Txerrimuñoko jostura-tailerra. Bat-batean koronabirusa hor iritsi zen, eta gure taldean ere lanean hasi eta dena antolatu genuen.

[Beren webgunean irakur dezakegunez, irabazi asmorik gabeko ekimena da, jostea zaletasun duten lagun batzuen eskutik jaioa. Bizi ditugun garai zail hauetan, maskarak egiten laguntzea da beren helburua, eta gehien behar dituztenei ematea]

• Zergatik eta zertarako sortu duzue?
  

Orain, geure burua eta ingurukoak babestu behar ditugulako, maskarak erabilita. Horrez gain, aukerarik ez duen jendeari bestelako aukera bat eman nahi diogulako ere bai, Trumpen eta enparauen aukeraren aurkakoa, desberdina. Hauek dira gure oinarrietako batzuk: ekonomia zirkularra, 0 km-ko kontsumoa, tokiko merkataritza txikia eta tradizionala sustatzea, eta emakume ikusezinak babestea (horiexek eusten baitiote sistemari).

[Taldeak Oarsoaldeko kolektibo hauentzat egiten du lan: koronabirusagatik arrisku-taldetzat hartu direna, eta gizarte-bazterketan daudenak edo arriskuan daudenak; batez ere, emakume ikusezinak, sistemako zutabe direnak. Beren hitzetan, sistema horrexek jartzen du kolokan gure planeta, are gehiago azken asteotan]

• Nor ari zarete lanean?
  

Jende pila bat eta entitate batzuk ari gara elkarrekin lanea; gero eta gehiago gara! Gu (Txerrimuñoko jostura-taldea), AEK-ko kideak ere laguntzen ari zarete, munduko jostun onenak, Gipuzkoako Medicus Mundi elkartea, Oreretako Mugimendu Feminista, Oarsoaldeko hainbat denda txiki, boluntario pila bat....

• Nola funtzionatzen du ekimenak?
  

Gure web orriaren bidez, nahi duenak maskarak eska ditzake, gure jostun boluntarioen sareak maskarak egiten ditu, eta ondoren, maskara horiek Oarsoaldeko hainbat lekutan banatzen ditugu, jasotzeko. Dena boluntarioa da, eta laguntzeko modu asko daude: maskarak josita, materiala emanda, maskarak banatuta, sare sozialak dinamizatuta, lan-talde guztia koordinatuta...

• Nolako erantzuna jaso duzue? 
  

Oro har, oso egokia. Jendeari asko gustatu zaio ekimena jendeagandik sortua dela, eta ez goiko instantzia batzuetatik.

• Hasi zarete eskaerak jasotzen?
  

Bai, lehen egunetik! Eskaera ugari daukagu. Tamalez, ezin izango diegu eskaera guztiei erantzun, sistema honen arauek eta baldintzek dena muntatua daukatelako Trump eta lagunei laguntzeko, beraiek gehiago sal dezaten. Bide batez, bihotz-bihotzez, eskerrik asko laguntzen ari zareten guztioi. Hau guztia posible izan da bakarrik denon artean atera dugulako aurrera.