Korrika atarikoak prest dituzte Pasai Antxon

Pasai Antxoko Korrika batzordea, Txirrita AEK euskaltegiaren sarreran

Grafitia, Kontxita Beitiaren bisita, gastronomia lehiaketa
eta Tonbola, Korrika atarian

• Euskararen aldeko ekimena apirilaren 12an iritsiko da eskualdera, baina aurreko asteotan zenbait hitzordu prestatu ditu herriko Korrika batzordeak

Txirrita AEK motorrak berotzen hasi da Korrikara begira. Euskararen aldeko ekimena apirilaren 12an iritsiko da herrira, baina aurretik ekintza batzuk finkatu dira Korrika batzordeetan.

Hori horrela, martxoaren 22an, ostirala, Kuadrillategiko gazteek grafitia margotuko dute arratsaldean Ibaiondo pilotalekuan. Hilaren 25ean, astelehena, bestalde, Kontxita Beitiaren bisita jasoko dute Txirrita AEKko euskaltegian (10:00). Kontxita Beitiak lan handia egin zuen ikastolen sorreran, eta lotura estua du Antxorekin. Horri guztiari buruz hitz egingo du Beitiak euskaltegian (sarrera librea da).

Bestalde, martxoaren 31n, igandearekin, Labore Egin Klika Gastronomiari! Lehiaketa egingo da Gure Zumardian 12:00etan. Entsalada egin beharko dute parte hartzaileek (gehienez, lau laguneko taldeak) Laborek eskura jarritako osagaiak baliatuta (erne! aldez aurretik eman behar da izena: pasaia@aek.eus). Egun horretan, gainera, Korrika arropa salgai egongo da, eta Korrika Tonbolari hasiera emango zaio. Korrika Tonbolako txartelak apirilaren 4tik aurrera erosi ahal izango dira herriko hainbat tabernatan. Duela bi urteko Korrikan hamarnaka opari banatu ziren tonbolari esker: otorduak, produktu sortak, deskontuak...

Korrika egunean, apirilaren 12an, azkenik, ekintzaz betetako egitaraua prestatzen ari da Korrika batzordea. Besteak beste, Korrika Txikia izango da 15:30ean eta Korrika iritsi bitartean (21:00etan iritsiko da Antxora Altzan barrena) eta ondoren festa izango da herrian.

Txirrita AEKk sare sozialak erabiliko ditu ekimen horiei guztiei buruzko informazio zabala emateko.