ASMAKIZUN LEHIAKETA: ASTE HONETAKO ASMAKIZUNA

Ikusten duzuenez, honek ez du etenik eta, pasa den asteko lehiaketa gogoangarria oraindik fresko-fresko dugula, aste honetako lehiaketa berriari ekin behar diogu.

Oraingo honetan, Pasai Antxoko 3. taldeak prestatu du lehiaketa (goizeko B2 mailako taldea, Patxiren ikasleak). Besterik gabe, goazen pistak ikustera:

1. pista: Modari ez dio jaramonik egiten. Janzkera aukeratzeko ez du denbora asko galtzen, ez baitu galtzontzilo dotoreak eramateko beharrik.
2. pista: Bere iritzia kontuan hartu beharrekoa da. Ohartu gabe, gure egunerokotasunean sartuta dago.
3. pista: Ezkongabea da eta, guk dakigunez, ez du emakumerik "ezagutu". Gainera, garai bateko euskal aztien ondorengoa da.
4. pista: Bere ibilbidea oso zabala da. Bere arlorik ezagunena ez izan arren, musika irratsaioetan ere ibilia da.

Zer? Ba al dakizue zeri buruz ari diren? Ala arrastorik ere ez duzue? Egia esan, aitortu beharra dugu gure ikasle hauek prestatzen dituzten lehiaketak ez direla batere errazak...

Beno, aste honetan, 10. Korrikako itsas-kapusai historiko eta dotorea dugu sari moduan. Beti bezala, erantzunak orereta@aek.org helbidera bidali. Erantzunak jasotzeko epea ostiralean bukatuko da, hilak 18, 18:00etan. Argazkian kapusaia:

Animatu eta bidali zure erantzuna!

Eta, oraingoan, pistek hala iradoki digutenez, ondorengo irudia daukazue.

On egin!